Urtarrilak 30 eta 31, Bartzelonan Finantza Etiko eta Solidarioetan Hezteko Sarearen (RedEFES) VI. Jardunaldiak egin ziren, irakasleentzako eta gizarte-erakundeei lotutako pertsonentzako topagune eta ikaskuntza kolektiborako gunea. «Sutan dagoen mundu baterako hezkuntza ekonomikoa» jardunaldien izenburuak, krisi anizkoitzek, gero eta desberdintasun handiagoek eta gero eta polarizatuagoa den giro politikoak markatutako testuinguru batean ekonomia irakasteko moduari buruz hausnartzera gonbidatzen zuen. Mugarik Gabeko Ekonomialarietatik, Euskadiko Anek parte hartu zuen, eta, horrela, erakundeak gune horietan duen presentzia indartu zuen, ekonomia justuagoa lortzeko.
Ekonomia justizia globaletik pentsatzea
Lehenengo jardunaldia ostiralaren 30ean izan zen, La Lleialtat Santsenca (Carrer d’Olzinelles, 31) gunean. Hausnarketa kritikoa eta eztabaida politikoa uztartu zituen, eta aurrez aurre zein streaming bidez jarraitu ahal izan zen. Abiapuntua justizia ekonomiko globala izan zen, eskuin muturraren gorakadaren testuinguruan, Cecil Barbeito eta Koldobi Velascoren eskutik.
Hitzaldiek ekonomiaren, egiturazko indarkeriaren eta militarizazio-prozesuen arteko harreman estua jarri zuten mahai gainean, bai eta zenbait kultura-kontakizunek eredu ekonomiko nagusiaren legitimazioan duten zeregina ere. Ekonomia neutro edo tekniko hutsaren ideiaren aurrean, erabaki ekonomikoak baloreek, interesek eta botere-harremanek zeharkatzen dituztela azpimarratu zen. Esparru horretan, hezkuntza funtsezko tresna gisa agertu zen kontakizun horiek zalantzan jartzeko, kapitalismoaren ondorio sozial eta ekologikoak ikusarazteko eta adostasun sozial bidezkoagoak eraikitzen laguntzeko.
Wall Streetetik eguneroko bizitzara
Arratsalde bereko bigarren saioan, «Wall Streetetik zure zorrora: finantza sistema neoliberalak nola eraikitzen dituen kontakizunak» izenekoan, Hibai López-Gonzálezek eta Nicola Schererrek hartu zuten parte. Eguneko unerik argigarrienetako bat izan zen, finantzazioaren fenomenoak lur hartzea lortu baitzuen, bai makro mailan, bai pertsonen eguneroko bizitzan.
Finantza-desarautzea, itzaleko banka eta espekulazioan eta arriskuan oinarritutako kultura ekonomikoaren hedapena bezalako gaiak jorratu ziren. Baina, batez ere, prozesu horiek etxebizitza eskuratzea, osasuna edo hezkuntza bezalako oinarrizko alderdietan eragin zuzena dutela azpimarratu zen. Mikro mailan, kriptomonetak eta eguneroko bizitzako finantza-produktu konplexuak aipatu ziren, askotan arriskuak benetan ulertu gabe.
Eredu horren aurrean, justizia fiskala, finantza etikoak eta ekonomia sozial eta solidarioa indartuko dituzten kontakizun alternatiboak eraikitzeko premia nabarmendu zen, sen on ekonomiko nagusia eztabaidatzeko gai izango direnak.
Lehenengo egunaren amaiera sinbolikoa bezain koherentea izan zen saioen edukiarekin. Hausnarketa-orduen ondoren, teoriatik ukigarrira igaro zen finantza etikoen bidez finantzatutako looperatiben produktuen dastaketa: jogurtak, gaztak eta zukuak, eredu ekonomiko bakoitzaren atzean bizitza ekoizteko, kontsumitzeko eta mantentzeko modu zehatzak daudela gogorarazi zutenak.
Larunbat bat alternatibak partekatzeko
Bigarren jardunaldia, larunbata 31, egun osoan zehar egin zen Bloc4BCNn (Carrer de la Constitució, 19). Ostiralean tonu analitikoagoa izan bazuen, larunbatean ikuspegi propositiboa eta pedagogikoa hartu zuen argi eta garbi.
Goiza finantza etikoen alternatibei buruzko saio batekin hasi zen, eta bertan hainbat erakundek euren funtzionamendua eta printzipioak azaldu zituzten: gardentasuna, gobernantza demokratikoa, lurralde-errotzea eta guztion onerako orientazioa. Ondoren, Arcadi Oliveres saria aurkeztu zen, aurreko edizioko pertsona eta esperientzia irabazleak aintzatetsiz.
Unerik aberasgarrienetako bat hezkuntza esperientzien karrusela izan zen. Bertan, irakasleek beren ikasgeletan garatzen ari diren praktikak partekatu zituzten. Sareak ehuntzearen, metodologiak partekatzearen eta irakasleak beren esperientziak bidaltzera animatzearen garrantzia nabarmendu zen, RedEFESeko hezkuntza-komunitatea indartzen jarraitzeko
Ikasgelara eramateko gaiak dituzten tailerrak
Bazkalostean, hainbat aldi beereko tailer egin ziren: bidezko fiskalitatea, banku armatua, desinformazioa eta polarizazioa, justizia sozialerako teknologia irekia, finantza etikoak eta ekonomia sozial eta solidarioa. Anek, Mugarik Gabeko Euskadiko Ekonomialarietatik, desinformazioari eta polarizazioari buruzko tailerrean parte hartu zuen.
Espazio horretan, adimen artifizialaren, fake news-en eta egiazko informazioa manipulatutako edukietatik bereizteko gero eta zailtasun handiagoaren inguruan hausnartu zen. Gazteekin eta ikasleekin lan egiteko tresna eta ikuspegi pedagogikoak partekatu ziren, pentsamendu kritikoa indartzeko eta desinformazioa prebenitzeko. Eztabaidak agerian utzi zuen alfabetatze mediatikoa eta digitala hezkuntza ekonomikoaren zati banaezina dela. Jardunaldiari amaiera emateko, tailerrak bateratuta eta ikaskuntza nagusiak bilduta itxi ziren.
Etorkizun desberdinak irudikatzeko hezi
Oro har, RedEFESen VI Jardunaldiek ondorio partekatu bat utzi zuten: hezkuntza ekonomiko kritikoa ezinbesteko tresna da oraina ulertzeko eta, batez ere, alternatibak irudikatzeko eta eraikitzeko. Onura eta metaketa lehenesten dituen ereduaren aurrean, bizitza, justizia soziala eta guztion ongia erdigunean jarriko dituen hezkuntzaren aldeko apustua egin zuten jardunaldiek.
Parte-hartzaile askorentzat, jardunaldiak oso aberasgarriak izan ziren, eta beste ekonomia bat beharrezkoa ez ezik irakasgarria ere badenaren ustea indartu zuten.
<< Euskadiko ordezkaritzaren azken berriak
