Ekonomia birplanteatzen duten emakumeak

Emakumeak gizartearen kontakizunetik kenduz eraiki eta betikotzen da desberdintasuna, eta, diziplina gehienetan bezala, jasaten dugun egiturazko indarkeriaren ondorioz, ekonomian ere emakumeak ikusezinak izan gara.

Horregatik, Mugarik Gabeko Ekonomialarien boluntarioen taldean, hainbat diziplina, leku eta garaitatik egungo eredu ekonomikoaren azterketan, berrikuspenean eta birplanteamenduan ekarpen handia egin duten emakume horiek ezagutzeko beharra sortu zaigu.

Proiektu honen bidez emakume horiengana hurbildu, ezagutu, irakurri, zer kontatzen duten eta nola egiten duten jakin nahi dugu. Beren proposamenak ulertu eta beren begirada kritikotik ikasi nahi dugu, eredu ekonomiko desberdin eta bidegabe batetik abiatuta. Azken batean, ikuspegi feministatik eta bizitzarako zainketen ikuspegitik zer proposatzen duten jakin nahi dugu. Gainera, erreferenteak sortu nahi ditugu gazteenentzat, bai eta haien teoriak eta proposamenak jendarteratu ere, gizartean zabaltzeko.

Hauek dira gure proiektuaren bidez lortu nahi ditugun helburuak:

1. Hainbat diziplinatan trebatutako emakumeen ekarpena ikusaraztea. Emakume horiek leku desberdinetakoak izan behar dute, garai desberdinetan jaiotakoak, eta sistema sozioekonomiko batek eragindako desberdintasunaren eta bidegabekeriaren aurkako kritika komuna izan behar dute. Izan ere, sistema horrek emakumeak baztertzen eta instrumentalizatzen ditu, eta kalte larriak eragiten ditu emakumeen eta gizonen bizi-kalitatean eta naturan.
2. Eredu ekonomiko hegemonikoaren aurrean emakume horiek eskaintzen dizkiguten proposamenak orainera ekartzea, gizarte osoaren eta planetaren ongizatea bilatzen duten eredu inklusibo eta solidarioetarantz aldatzeko alternatiba errealak eraiki eta bultzatzeko.
3. Emakumeen pentsamendu kritiko eta proposatzailea berreskuratzeko interesa duten pertsonen sare bat sortzea, interesa duten pertsona guztiei argitalpen honetan parte hartzeko aukera eskainiz. Horrela, parte-hartze aktiborako bide bat ireki nahi dugu, eta proposamen errealistak eta oinarridunak dituen eraldaketa sozioekonomikoa defendatuko duten subjektu politikoak eraikitzen lagundu.